Թբիլիսիում մեկ հայկական դպրոց է գործում

- Ծնողներիս ժամանակ 40 հայկական դպրոց էր գործում, երբ ես առաջին դասարան գնացի` հայկական 8 դպրոց կար, հիմա ընդամենը 1 հայկական ուսուցմամբ դպրոց կա Թիֆլիսում,- պատմում է Վիրահայոց թեմի մշակույթի բաժնի տնօրեն` Լևոն Չիդիլյանը:-Երբ հայկական դպրոցները պակասեցին հայերն սկսեցին ռուսական դպրոցներ գնալ, հիմա`ավելի շատ  վրացական դպրոցներ են գնում:

  Այսինքն հայոց լեզվի, հայ ազգային մշակույթի պահպանման խնդիր կար. 2011թ. հոկտեմբերի 8-ին` Թարգմանչաց տոնի օրը,  բացվեց «Հայարտուն»` Հայ արվեստի տուն կենտրոնը: Նպատակը` հայապահպանության և հայ-վրացական բարեկամության պահպանումն է, նշում է կենտրոնի

ղեկավարը: Գործում են տարբեր խմբակներ` երգի, պարի, ասմունքի, նկարչության, շախմատի, հայոց պատմության: Կենտրոնում գործում են նաև նախակրթարանն ու կիրակնօրյա դպրոցը:

  - Այստեղ հաճախող հայերի համար տարիքային սահմանափակում չկա, օրինակ այս պահին 90-ամյա տատիկ է հաճախում կիրակնօրյա դպրոց` հայերեն գրել-կարդալ է սովորում,-նշեց Լևոն Չիդիլյանը, ով նաև «Հայարտուն» կրթամշակութային կենտրոնի տնօրենն է:

  Բոլոր ծրագրերն իրականցվում են բարեգործական հենքի վրա, դժվարությունները շատ են, բայց արված գործի կարևորությունն ուժ է տալիս: Հասարակական գործունեությունը համախմբում է, ոգի ու կամք տալիս. հիմնականում ապրիլի 24-ին են հանրահավաքներ անցկացնում` Թուրքիայի դեսպանատան դիմաց, այս տարի Քեսաբում տեղի ունեցածն էլ պատճառ դարձավ հանրահավաք հրավիրելու:
 Միջոցառումներից մեկն էլ մայիսի 9-ին էր նախատեսված, բայց որոշ հանգամանքներով պայմանավորված` Թբիլիսիի քաղաքային իշխանությունները դահլիճ չտրամադրեցին, պատմում է Լ. Չիդիլյանը:  Այս մասին միջոցառման կազմակերպիչներն իմացան միջոցառումից ընդամենը 4 ժամ առաջ: Դժվար էր, բայց եկեղեցու բակում հաջողվեց բեմ հավաքել ու տոնել Շուշիի հաղթանակը:

  -Չեմ բողոքում, ուղղակի ներկայացնում եմ իրականությունը, շատ են դժվարությունները, սուր տարբերություններ են նկատվում սկսած հայերեն տպագրված գրքերի թղթի որակից մինչև կրթամշակութային ու հասարակական միջոցառումներ, բայց որտեղ հայ կա, համախմբում ենք և օգնում հայ մնալ բոլոր իրավիճակներում,-եզրափակեց Լևոն Չիդիլյանը: