Դպրոցի տնօրենը չարաշահել է պաշտոնական դիրքը

20212. Oգոստոսի 16-ին Լոռու մարզի առաջին ատյանի ընդհանուր իրավասության դատարանի Վանաձոր նստավայրում քննվում էր Գ. Ռաֆայելյանի, Կ. Ավետիսյանի և Ս. Մկրտչյանի գործը: Սակայն քրեական գործով դատական նիստը չկայացավ: Դատական նիստին, թեև պատշաճ ծանուցվել էին, սակայն չէին ներկայացել տուժողի ներկայացուցիչ Գ. Տոնոյանը և ամբաստանյալ Ս. Մկրտչյանը:

Հուլիսի 26-ին  դատարանի կողմից ուղարկված Ս. Մկրտչյանի  ծանուցումը հետ է ուղարկվել տեղափոխված նմուշով: Իսկ տուժողի ներկայացուցիչ Գ. Տոնոյանի դատական նիստին չներկայանալու մասին, ինչպես նիստի քարտուղարը նշեց, դատարանը լուր չուներ: Նշենք նաև, որ ծանուցումները չեն հասել նաև մյուս կողմերին, սակայն դատական նիստին մյուսները ներկայացել էին փաստաբանների կողմից տեղեկացվելու շնորհիվ: Ավելացնենք նաև, որ Ս. Մկրտչյանը այս գործով փաստաբան չունի:

Գ. Ռաֆայելյանին մեղադրանք է առաջադրվել պաշտոնական դիրքի չարաշահման հիմքով։ Գ. Ռաֆայելյանը «Միխայլովկայի միջնակարգ դպրոց» ՊՈԱԿ-ի տնօրենն է։

Գ. Ռաֆայելյանը 2010 թվականին որպես ՆԶՊ ուսուցիչ և քաղպաշտպանության շտաբի պետ, աշխատանքի է ընդունել Կ. Ավետիսյանին: 2015թ. հոկտեմբեր ամսից սկսած՝ Կ. Ավետիսյանը, որդուն խնամելու նպատակով  տեղափոխվել է Երևան՝ մշտական բնակություն հաստատելով այնտեղ: Եվ, քանի որ հնարավորություն չուներ ամեն օր աշխատանքի ներկայանալ, խնդրել է դպրոցի տնօրենին, որպեսզի ՆԶՊ դասաժամերը ըստ դասացուցակի տեղավորվի  շաբաթական 1 օրում: Տնօրենն այս հարցում ևս տվել է իր համաձայնությունը։ Կ. Ավետիսյանը պետք է աշխատեր աշխատանքայի ամբողջ շաբաթը՝ օրական 8 ժամ տեևողությամբ, սկայն դրա փոխարեն դպրոցում աշխատել է ընդամենը 1օր: Այսպիսով, ստացվում է, որ Կ. Ավետիսյանը չաշխատած օրերի դիմաց ստացել է 2.901.570 ՀՀ դրամ աշխատավարձ:

Իսկ արդեն Գ. Ռաֆայելյանը 2013թ․ հոկտեմբերի 18-ին աշխատանքի է ընդունել Ս. Մկրտչյանին՝ տնտեսվարի հաստիքով։ Տնտեսվար Ս. Մկրտչյանը 2019թ․ ապրիլ ամսից մեկնել է ՌԴ: Երկրից բացակա լինելու փաստը թաքցնելով՝ դպրոցի տնօրենը շարունակել է Ս. Մկրտչյանին աշխատավարձ վճարել՝ փաստացի չաշխատած ժամերի դիմաց: Տնտեսվար Ս. Մկրտչյանին տնօրեն Գ. Ռաֆայելյանը, չարաշահելով իր պաշտոնական դիրքը, բյուջեից չաշխատած օրերի դիմաց վճարել է 812.257 ՀՀ դրամ:

Միխայլովկայի միջնակարգ դպրոցի ՆԶՊ ուսուցիչ և քաղպաշտպանության շտաբի պետ Կ. Ավետիսյանին և տնտեսվար Ս. Մկրտչյանին մեղադրանք է առաջադրվել այն բանի համար, որ  նախապես իմանալով իրենց աշխատանքի չհաճախելու փաստը , տնօրենի հետ համաձայնության գալով, նրա աջակցությամբ կազմակերպության բյուջեից աշխատավարձ են ստացել:

Քրեական գործով հաջորդ դատական նիստը կկայանա հոկտեմբերի 7-ին։

      Հոդվածը պատրաստել է «Մեդիաակումբ» ՔՀԶ ՀԿ-ն, «Աջակցություն դատաիրավական բարեփոխումներին»
                 ծրագրի շրջանակներում, որը իրականացնում է Եվրասիա համագործակցություն հիմնադրամը
                                           «Հելսինկյան ասոցիացիա» և «Իրավունքի ուժ»  հասարակական կազմակերպությունների հետ համատեղ:

 Հոդվածի բովանդակությունը և արտահայտված տեսակետները միմիայն «Մեդիաակումբ» ՔՀԶ ՀԿ-ին են
  և կարող են չհամընկնել Եվրասիա համագործակցություն հիմնադրամի կամ «Հելսինկյան ասոցիացիա» և «Իրավունքի ուժ»
   հասարակական կազմակերպությունների տեսակետներին: